Naxçıvan Müəllimlər İnstitutunda magistratura səviyyəsində təhsil alan tələbələrin elmi-pedaqoji təcrübə müddəti çərçivəsində açıq dərsləri keçirilib. Təcrübənin əsas məqsədi magistrantların pedaqoji bilik və bacarıqlarının inkişaf etdirilməsi, onların gələcək müəllimlik fəaliyyətinə hazırlanması və auditoriya qarşısında sərbəst çıxış imkanlarının artırılması olub.
Açıq dərslər müxtəlif ixtisaslar üzrə təşkil olunaraq müasir tədris metodlarının tətbiqi, interaktiv yanaşmaların istifadəsi və tələbələrlə səmərəli ünsiyyətin qurulması baxımından diqqət çəkib. Magistrantlar dərs prosesində innovativ təlim texnologiyalarından istifadə etməklə mövzuları əhatəli və aydın şəkildə təqdim ediblər.
Dərslərdə institutun professor-müəllim heyəti iştirak edərək magistrantların çıxışlarını izləyib, onların pedaqoji yanaşmalarını dəyərləndirib və metodiki tövsiyələr veriblər. Təcrübə müddətində keçirilən açıq dərslər gələcək mütəxəssislərin peşəkar inkişafında mühüm mərhələ kimi qiymətləndirilib.
Qeyd edək ki, elmi-pedaqoji təcrübə proqramı magistrantların nəzəri biliklərini praktik fəaliyyətlə uzlaşdırmağa xidmət edir və onların tədris prosesinə daha hazırlıqlı şəkildə qoşulmalarına şərait yaradır.
