Təhsil Tələbə Krediti Fondunun İdarə Heyətinin sədri Araz Paşayevin Naxçıvan Müəllimlər İnstitutunun tələbələri ilə görüşü olub

Təhsil Tələbə Krediti Fondunun İdarə Heyətinin sədri Araz Paşayevin Naxçıvan Müəllimlər İnstitutunun tələbələri ilə görüşü olub
Görüşdə giriş sözü ilə çıxış edən İnstitutun rektoru Azad Novruzov qeyd edib ki, “Azərbaycan Respublikası Təhsil Nazirliyinin tabeliyində Təhsil Tələbə Krediti Fondu”nun yaradılması ölkəmizdə hərtərəfli və davamlı inkişafın etibarlı yolu olan təhsilə daha çox diqqət və qayğı göstərilməsinin bariz nümunəsidir. Bu gün təhsilin müasir dünya standartlarına uyğun təşkili, mövcud intellektual potensialın zənginləşdirilməsi tələbələrin qarşısına böyük məsuliyyət qoyur və bu istiqamətdə ali təhsil sistemi ölkənin başlıca inkişaf amili kimi çıxış edir.
Rektor bildirib ki, 2021-2022-ci tədris ilində Naxçıvan Müəllimlər İnstitutunda təhsil alan tələbələrin Təhsil Tələbə Krediti Fonduna ümumilikdə 53 müraciəti olmuş, onlardan 21 nəfəri sosial, 32 nəfəri isə standart kreditə mütraciət etmiş, 4 nəfərinə iki dəfə olmaqla 7 tələbəyə ödəniş olunmuşdur. Rektor fondun yaradılmasının gənclərin təhsilə əlçatanlığı üçün əhəmiyyətliliyini vurğulayıb.
Sonra təbliğat, təşviqat və maarifləndirmə məqsədilə keçirilən görüşdə Təhsil Tələbə Krediti Fondunun İdarə Heyətinin sədri Araz Paşayev Azərbaycan Respublikası Prezidentinin 17 iyun 2021-ci il tarixli 1367 nömrəli Fərmanı ilə Azərbaycan Respublikası Təhsil Nazirliyinin tabeliyində yaradılmış Təhsil Tələbə Krediti Fondunun fəaliyyət istiqamətləri və təhsil tələbə kreditlərinin növləri və kreditdən istifadə hüquqları, tətbiq edilən güzəştlər haqqında tələbələrə ətraflı məlumat verib. Təhsil Tələbə Kreditinin ayrılmasında məqsədin təhsilin hamı üçün, xüsusi ilə də əhalinin aztəminatlı təbəqələrindən olan şəxslərin əlçatanlığının təmin edilməsi, təhsildə bərabər imkanların yaradılması və təhsilin əhatə dairəsinin genişləndirilməsi olduğunu vurğulayan Araz Paşayev tələbələri maraqlandıran suallara cavab verib, maraqlı müzakirələr aparılıb.
İnstitutun Tədris və tərbiyə işləri üzrə prorektoru Çapay Quliyev çıxış edərək bütün kollektiv adından görüşün keçirilməsi məqsədilə Təhsil Tələbə Krediti Fondunun İdarə Heyətinə təşəkkürünü bildirib, iştirakçı tələbələrə yaradılan imkanlardan maksimum istifadə etməyi və güzəşt imkanlarından yararlanmağı tövsiyə edib.
Aygül Məmmədova
Naxçıvan Müəllimlər İnstitutunun mətbuat və ictimaiyyətlə əlaqələr xidməti