“Ümumdünya Autizm Məlumatlandırma Günü”nə həsr olunmuş “Autizm haqqında maarifləndirmə” adlı tədbir keçirilib
19 aprel 2024-cü il tarixində Pedaqogika və Psixologiya kafedrasının təşkilatçılığı ilə “Ümumdünya Autizm Məlumatlandırma Günü”nə həsr olunmuş “Autizm haqqında maarifləndirmə” adlı tədbir keçirilib
Tədbirdə Pedaqogika və Psixologiya kafedrasının müdiri Sevinc Vəliyeva qonaqları və iştirakçıları salamlayaraq tədbiri açıq elan edib. “Birgə və Sağlam” İctimai Birliyinin sədri Aytən Eynalova İctimai Birliyin fəaliyyəti haqqında məlumat verib, həm əhali arasında autizmlə əlaqədar maarifləndirmənin artırılması və autizmli insanların həyat keyfiyyətinin yaxşılaşdırılması məqsədilə həm də Autizm sindromlu övladın valideyni qismində çıxış etmişdir.
Daha sonra “Birgə və Sağlam” İctimai Birliyinin nəzdində Autizm Mərkəzinin psixoloqu Aynur Qəribova Autizm spektr pozuntusu nədir, Autizmli şəxslərlə necə davranmalı kimi günümüzdə maraq doğuran mövzular və problemin metodologiyası ilə bağlı təqdimat vasitəsilə maarifləndirici çıxış edib. Təqdimatda autizmin tibb elmində kəşfinin və diaqnozunun tarixi, autizm spektrumuna səbəb olan faktorlar, autizm spekturumu pozuntusunun əlamətləri, autizmli uşaqların və ailələrinin ehtiyacları, autizmdə reabilitasiya və istifadə olunan metodlar kimi məsələlərə toxunulub.
Bununla yanaşı, İctimai Birliyin fəaliyyətini əks etdirən video-çarxlar təqdim olunub, əyani fəaliyyətlərin nümayişi keçirilib.
Sonra tədbir bədii hissədə Mərkəzin nəzdində fəaliyyət göstərən “Mavi ürəklər” xor və ritm qrupunun ifaları ilə davam edib.
Daha sonra “Birgə və Sağlam” İctimai Birliyinin üzvlərinin əl işlərindən ibarət sərgi satış keçirilib. Sərgidə iştirak edən institutun rektoru Azad Novruzov qonaqları salamlayıb, keçirilən tədbirlərin daha inklüziv cəmiyyətin yaradılmasına, autizmdən zərər çəkmiş insanların istedadlarını aşkarlamağa və onların potensiallarından düzgün istifadə etməyə imkan yaratdığını qeyd edib.
Sonda institutun həyətində tədbir iştirakçıları tərəfindən səmaya simvolik olaraq mavi şarlar buraxılıb.
Aygül Məmmədova
Naxçıvan Müəllimlər İnstitutunun mətbuat və ictimaiyyətlə əlaqələr xidməti