Naxçıvan Müəllimlər İnstitutunda Riyaziyyatın tədrisində innovasiyalardan səmərəli istifadə” mövzusunda elmi-praktik konfrans keçirilmişdir

Konfransı giriş sözü ilə açan institutun rektoru Elbrus İsayev bildirmişdir ki, innovasiyalardan səmərəli istifadəyə həsr olunmuş bugünkü tədbir Naxçıvan Muxtar Respublikası Ali Məclisinin Sədrinin imzaladığı “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinə dair əlavə tədbirlər və innovasiyaların dəstəklənməsi haqqında” Sərəncamından irəli gələn vəzifələrə həsr olunmuşdur. Naxçıvan Müəllimlər İnstitutunun “Ali riyaziyyat və informatika” və “Riyaziyyat və tədrisi metodikası” kafedralarının birgə hazırladıqları  konfransda müvafiq kafedraların professor-müəllim heyəti,  bir sıra ümumtəhsil məktəblərin riyaziyyat müəllimləri və tələbələri iştirak etmişlər. Konfransın aktuallığından bəhs edən rektor qeyd etmişdir ki, bu gün Muxtar Respublikamızda təhsil infrastrukturunun mövcud olan yüksək imkanları hər bir sahədə innovativ yanaşmanı zəruri məsələ kimi müəyyənləşdirir. O cümlədən fənlərin tədrisi zamanı innovativ metodlardan istifadə təhsilimizin məzmununa və strategiyasına uyğun qurulmalıdır. Bugünki  konfransda riyaziyyatın tədrisinə dair təqdim  olunan məruzələr bu sahədə yeni yanaşmaların tətbiqi baxımından mühüm aktuallıq kəsb edir.

Daha sonra “İnnovativ metodlarla riyaziyyat təliminin təşkili və metodları” mövzusunda Riyaziyyat və tədrisi metodikası kafedrasının dosenti Südabə Məmmədova, “Kompyuterin inkişaf tarixi və qurğuları” mövzusunda Ali riyaziyyat və informatika kafedrasının baş müəllimi Səminə Rüstəmova, “Riyaziyyatın  tədrisində müasir  metodların tətbiqi” mövzusunda  Ali riyaziyyat və informatika kafedrasının müəllimi Səriyyə Qasımova, “Didaktik və interaktiv oyunların riyaziyyat dərslərinin tədrisində rolu” mövzusunda, Ali riyaziyyat və İnformatika kafedrasının müəllimi Fidan Əzizova, “Riyaziyyat dərslərində inteqrasiyadan istifadə yolları” mözusunda Ali riyaziyyat və informatika kafedrasının dosenti Rövşən Vəliyev, “İKT-dən istifadə etməklə fəza fiqurlarının  innovativ metodlarla  öyrədilməsi” mövzusunda Riyaziyyat və tədrisi metodikası kafedrasının  müəlimi  Könül Məmmədovanın məruzələri dinlənilmişdir.

Konfrans dəyirmi masa ətrafında diskussiya şəraitində davam etmişdir.

NMİ-nin Mətbuat  və  İctimaiyyətlə əlaqələr xidməti